Sizə saytımın adı ilə bağlı məlumat vermək istəyirəm.
Niyə məhz "My Religion is Nature"?
Bu adın mənası 21.10.2022-ci ildə baş tutan gözəl bir görüşə bağlıdır. Bildiyiniz kimi, dağlara, təbiətə və alpinizmə böyük sevgim var. Bu tarixdə də belə bir görüşə və təlimə qatıldım. Görüşdüyüm şəxs isə, 9 il ərzində (2000-2009) 14 səkkizminlik zirvəni (oksigensiz) fəth etmiş alpinist Denis Urubko idi.
Görüş zamanı aramızda maraqlı bir dialoq baş tutdu. Dağlardan və təbiətdən danışdıq. Söhbətin sonunda mən ona can sağlığı və səmimi arzularımı çatdırdım (çox sevincli və xoşbəxt idim, gözlərim parıldayırdı). O isə "hər zaman gözlərinin belə brilliant kimi parıldamağını arzu edirəm" dedi. Ən sonda mənə dinim haqqında sual verdi: "Sənin dinin nədir?" Mən düşündüm və ciddi cavab verməyə çalışdım. Ancaq Denis gülümsəyərək dedi ki, "Твоя религия это - природа", yəni "Sənin dinin - təbiətdir". Bu sözlər mənim qulaqlarımda qaldı və bu layihəni yaratdığım zaman bu ifadəni seçməyə qərar verdim. Həm məni əks etdirir, həm də maraqlıdır. Başqa ad düşünmədən bu adı seçdim və düşünürəm ki, çox gözəl alınıb.
Əgər bura qədər oxudunuzsa, "My Religion is Nature" ifadəsinin tarixini öyrənmiş oldunuz. Sonda Denisə sevgilərimi və bu ideyanı mənə yaşatdığı üçün təşəkkürümü bildirirəm. Həmçinin, oxuyan hər birinizə təşəkkür edirəm❤️.
Commentaires